ജനറല് ആശുപത്രിയിലെ തീവ്രപരിചരണ വിഭാഗത്തില് പ്രവേശിപ്പിച്ച യുവതിയുടെ നില ഗുരുതരമല്ലെന്ന് ആശുപത്രി അധികൃതര് അറിയിച്ചു. പനിയ്ക്കുള്ള പാരസെറ്റാമോള് ഗുളികളാണ് 10 എണ്ണം ഒന്നിച്ചു കഴിച്ചതെന്നും ഡോക്ടര്മാര് സ്ഥിരീകരിച്ചു. കാസര്കോട് സ്വദേശിയായ ഇരുപത്തഞ്ചുകാരിയെ സ്പെഷല് മാര്യേജ് നിയമപ്രകാരം വിവാഹം കഴിച്ചതാണെന്നും മാതാപിതാക്കളുടെ അന്യായതടങ്കലില് നിന്നു മോചിപ്പിക്കണമെന്നും ആവശ്യപ്പെട്ട് നെടുമ്പാശേരിയില് താമസിക്കുന്ന എം. ഹസീന് മുഹമ്മദ് സമര്പ്പിച്ച ഹേബിയസ് കോര്പസ് ഹര്ജിയാണു കോടതി പരിഗണിക്കുന്നത്.
ഹര്ജിക്കാരനോ മാതാപിതാക്കളോ യുവതിയുമായി ആശയവിനിമയത്തിനു ശ്രമിക്കരുതെന്നു ജസ്റ്റിസ് പി.എന്. രവീന്ദ്രന്, ജസ്റ്റിസ് എ. കെ. ജയശങ്കരന് നമ്പ്യാര് എന്നിവരുള്പ്പെട്ട ഡിവിഷന് ബെഞ്ച് നിര്ദേശിച്ചു.
കഴിഞ്ഞ ദിവസം കോടതി നിര്ദേശം നല്കിയതിനെ തുടര്ന്ന് അച്ഛനാണ് യുവതിയെ കോടതിയില് ഹാജരാക്കിയത്. എന്നാല്, താന് വിഷം അകത്താക്കിയിട്ടുണ്ടെന്നു യുവതി കോടതിയില് പറഞ്ഞു. കോടതി ചോദിച്ചപ്പോള് പത്തിലേറെ ഗുളികകള് കഴിച്ചതായി വെളിപ്പെടുത്തി.
തുടര്ന്നു ഹൈക്കോടതി ഡിസ്പെന്സറിയില് നിന്നു ഡോക്ടറെ വരുത്തി. ഡോക്ടര് ശുപാര്ശ ചെയ്ത പ്രകാരം കൂടുതല് പരിശോധനയ്ക്കായി എറണാകുളം ജനറല് ആശുപത്രിയില് എത്തിക്കാന് കോടതി നിര്ദേശിച്ചു. ഡോക്ടറുടെയും വനിതാ പൊലീസിന്റെയും അകമ്പടിയിലാണു യുവതിയെ ജനറല് ആശുപത്രിയില് എത്തിച്ചത്.
Keywords: Kasaragod, Kerala News, National News, Gulf News, Health News, Educational News, MalabarFlash, Malabar Vartha, Malabar News, Malayalam News
